(အနော်ရထာမတိုင်မှီ ခေတ်နှင့် အနော်ရထာခေတ်တွင် အကျင့်ပျက် ဆိုးသွမ်း
အရည်းကြီးများမရှိကြောင်း သမိုင်းသုတေသနဖြင့် တင်ပြခြင်း)
မြန်မာသက္ကရာဇ် ၁၀၇၆၊ (အေဒီ ၁၇၁၄)တွင် နန်းတက်သည့် တနင်္ဂနွေမင်း
လက်ထက်တွင် ရေးသားသည့် ဦးကုလား၏ မဟာရာဇဝင်ကြီးတွင်
ပုဂံအနော်ရထာမတိုင်မီနှင့် အနော်ရထာခေတ်တို့၌ ပန်းဦးလွှတ်ခြင်း၊ ရေငုပ် မီးလှုံ တုံးခုန် ဇယ်တောက် စသည့် အကျင့်ဆိုးများကျင့်သည့် အရည်းကြီးဆိုးများသာ ရှိသည်ဟု ရေးသားခဲ့ပါသည်။
(နောက်ဝါကျများတွင် စာမရှည်စေရန် အရည်းကြီး ဟုသာ အတိုရေးမည်ဖြစ်ပြီး
ထိုအရည်းကြီး ဟူသောစကားလုံးသည် ပန်းဦးလွှတ်ခြင်း၊ ရေငုပ်မီးလှုံ တုံးခုန် ဇယ်တောက် စသည့် အကျင့်ဆိုးများကျင့်သည့် အရည်းကြီးဆိုးများ ဟူသော စကားစုကို
ရည်ညွှန်းသည်။)
ကျွန်ုပ်တို့ သမိုင်းသုတေသီများသည် ထိုအရည်းကြီးများ တကယ်ရှိခဲ့၊ မရှိခဲ့ကို
နိုင်ငံတကာမှ သမိုင်းပညာရှင်များလက်ခံသည့် စံဖြင့် စစ်ဆေး သုတေသန ပြုခဲ့ကြသည်။
သုတေသနပြုပုံမှာ ထိုအရည်းကြီးများရှိခဲ့သည် ဆိုသော ပြည်တွင်းပြည်ပ မည်သည့်ခေတ်ပြိုင်မှတ်တမ်း မှတ်ရာ ကျန်သနည်းဟု ပိုက်စစ်တိုက်ရှာဖွေခြင်း ဖြစ်သည်။
အထောက်အထားများထဲတွင် ကျောက်စာအထောက်အထားသည် သမိုင်းစံအရ
အလွန်ခိုင်မာသည့်အတွက် အနော်ရထာ ရှေ့နောက် ခေတ် ကျောက်စာများတွင်
ရှာဖွေရပါသည်။
မြန်မာတို့၏ ဗုဒ္ဓဘာသာ ယဉ်ကျေးမှုဓလေ့တွင် မိမိအလှူရှည်ကြာတည်တံ့စေသောငှါ၊
တပါးသူမဖျက်ဆီးစေရန် အလို့ငှါ၊ အများသူငါ အမျှယူသာဓုခေါ်စေရန် အလို့ငှါ
ကျောက်စာမှတ်တမ်းများ ရေးထိုးခဲ့လေ့ရှိပါသည်။
အနော်ရထာမင်းသည် ယုတ်သောအကျင့်ဆိုး အရည်းကြီးဆိုးတို့ကို ရှင်းလင်း၍
မြတ်သောထေရသာသနာကို စတင်ပြုသည့် ကြီးမားသော သာသနာပြုလုပ်ရပ်ကို
လုပ်ခဲ့သည်ဆိုလျှင် ကျောက်စာဧကန်ထိုးခဲ့မည်ဟု ပညာရှင်များတွက်ဆကြသည်။
အဘယ်ကြောင့်နည်းဆိုသော် အနော်ရထာမင်းသည် လက်တစ်ဝါးစာ သေးသေး
မွှားမွှားအုတ်ခွက်ဘုရား၌ပင် မိမိ၏အလှူဖြစ်သည်ဟု ပါဠိဘာသာဖြင့် ရေးထိုးသွား၍
ဖြစ်သည်။
အနော်ရထာနန်းစံကာလသာမက တုတ္ထပုဂံခေတ်ဦး အနော်ရထာမင်းစော၊ စောလူးမင်း၊
ကျန်စစ်သား၊ အလောင်းစည်သူ စသည့်မင်းလေးပါးခေတ်တွင် ၂၀၀၄ခုနှစ်အထိ တွေ့ရှိစာရင်းအရ မြန်မာဘာသာထိုးချည့် စုစုပေါင်း ၇၃ချပ်
မွန်ဘာသာထိုးကျောက်စာ ၂၁ချပ်နှင့် ပါဠိဘာသာထိုးကျောက်စာများတွင်
ထိုအရည်းကြီးများ ရှိခဲ့ကြောင်း၊ ဆိုးသွမ်းခဲ့ကြောင်း၊ မင်းကနှိမ်နှင်း ခဲ့ရကြောင်း မပါပါ။
၎င်းအပြင် ကိုလိုနီခေတ်တွင် ဦးဖေမောင်တင်နှင့်တပည့်များကွင်းဆင်းပြီး၊ ဂျီအိတ်ခ်ျလုစ်၊
ချားဒူရွယ်ဆယ်တို့ ပြုလုပ်ခဲ့သော မြန်မာနိုင်ငံ အနှံ့တွေ့ ကျောက်စာများကို ပုံနှိပ်ထားသည့် တိုင်းရင်းပုံထုတ် ကျောက်စာ ၂တွဲ၊ ရှေးသုမှ ထုတ်သည့် ရှေးဟောင်းမြန်မာ
ကျောက်စာများ ၅တွဲ၊ မန္တလေးမဟာမုနိဝင်းအတွင်းမှ ကျောက်စာများ ၂တွဲ၊ စစ်ကိုင်း
ထူပါရုံဘုရားဝင်းအတွင်းကျောက်စာများ စသည့်မည်သည့်ကျောက်စာတွင်မှ
အရည်းဆိုးများကြီးစိုးခဲ့ကြောင်း၊ မင်းကနှိမ်နှင်းခဲ့ရကြောင်း မပါပါ။
နောက်တစ်ခုမှာ ပုဂံဘုရားများမှ နံရံဆေးရေးပန်းချီများ မင်စာများကို
စစ်ဆေးရခြင်း ဖြစ်သည်။
အနော်ရထာသာ အရည်းဆိုးများကို နှိမ်နှင်းခဲ့ပါက မြန်မာတို့ဓလေ့အရ
အနော်ရထာခေတ် မဟုတ်တောင်၊ နှောင်းပုဂံခေတ်တွင် အနော်ရထာမင်းမှ
အရည်းဆိုးတို့ကို နှိမ်နှင်းခဲ့ပုံဟု နံရံဆေးရေးများ ရေးဆွဲသင့်ပါလျက် လုံးဝ
ရေးဆွဲခဲ့ခြင်း မရှိပါ။
ထိုအရည်းဆိုများ ရှိခဲ့သည် မင်းကနှိပ်ကွပ်ခဲ့ရသည် ဆိုသည့် နံရံဆေးရေပန်းချီ၊ မင်စာ
အထောက်အထားလည်း လုံးဝမရှိပါ။
ပြည်တွင်းခေတ်ပြိုင်မှတ်တမ်းဖြစ်သော ရခိုင်ရာဇဝင်များတွင်လည်း အနော်ရထာခေတ်
တွင် ထိုအရည်းဆိုးများ ကြီးစိုးကြောင်း၊ မင်းကနှိပ်ကွပ်ခဲ့ရကြောင်း မပါပါ။
ပြည်ပခေတ်ပြိုင်မှတ်တမ်းအဖြစ် မြန်မာနိုင်ငံနှင့် သာသနာရေး အဆက်အဆံများခဲ့သော
သီဟိုမှတ်တမ်းများကို စစ်ဆေးသောအခါတွင် ထို အရည်းဆိုးများကြီးစိုး၊ မင်းကနှိပ်ကွပ်ရ
ဆိုတာ လုံးမပါပါ။
ပုဂံခေတ်နှောင်း ရှင်ဒိသာပါမောက် ပြုစုသည့် သင်ပုန်းကြီးဋီကာ၌ ပေမူ နိဒါန်းတွင်း
ပုဂံမင်း ၅၅ပါးကို ဖေါ်ပြထားသော်လည်း ထိုအရည်းကြီးဆိုး ဇတ်လမ်းကြီးကို
ရေးသားခဲ့ခြင်းလုံးဝမရှိ။
နောက်တစ်ခုအနေနှင့် ညောင်ရမ်းခေတ်ထက်စာလျှင် ပုဂံခေတ်နှင့် ပိုနီးသော
ပထမအင်းဝခေတ်မှ ရှင်မဟာသီလဝံသတို့ ရှင်လေးပါး၊ ရှင်မဟာရဌသာရ၊ ရှင်တေဇောသာရ၊ စသည့်စာဆို အကျော်တို့ စာများတွင် ထိုအရည်းကြီး ဇာတ်လမ်း
လုံးဝမပါ၊ လုံးဝ ရေးမသွားကြပါ။
ရှင်မဟာသီလဝံသလို ရာဇဝင်ကျော်ကို ရေးသွားသည့် စာဆိုတစ်ယောက်အနေနှင့်
ထိုအရည်းကြီး ဇာတ်လမ်းကြီးသာ တကယ်ရှိခဲ့လျှင် မရေးပဲ မနေဟု
ပညာရှင်များယူဆကြသည်။
လုံးဝရေးမသွားကြတာ ဦးကုလားမတိုင်မီက ထိုဇာတ်လမ်းမရှိ သောကြောင့်ဟု
ပညာရှင်တို့ မှတ်ချက်ပြုကြသည်။
ဤသို့ ကျောက်စာများ၊ နံရံမင်စာများ၊ နံရံဆေးရေးပန်းချီများ၊ ပြည်တွင်းပြည်ပ
မည်သည့်မှတ်တမ်းတွင်မှ အနော်ရထာမတိုင်မီခေတ်နှင့် အနော်ရထာခေတ်တွင်
ပုဂံ၌ အရည်းကြီးဆိုးများ ကြီးစိုးသည်၊ အနော်ရထာမှ နှိပ်ကွပ်ခဲ့ရသည်ဟု မပါရှိ၊
အထောက်အထားမရှိသဖြင့်၊ အနော်ရထာမတိုင်မီခေတ်နှင့် အနော်ရထာခေတ်တွင်
ထိုအရည်းဆိုးများဇတ်လမ်း တကယ်မရှိ၊ တကယ်မဖြစ်ခဲ့ပဲ၊ ၁၈ရာစု ညောင်ရမ်းခေတ်
ရောက်မှ ရာဇဝင်ဆရာ ဦးကုလား၏ အတ္တနောမတိ ထည့်သွင်းရေးသားမှုဖြစ်ကြောင်း
ပညာရှင်များက သုတေသနအရ အခိုင်အမာဆုံးဖြတ်ကြသည်။
ဦးကုလား အဘယ်ကြောင့် ယင်းကို ထည့်ရေသနည်း၊ သူ၏ ကိုယ်ပိုင်တီထွင်
ရေးသားချက်လား၊ မည်သည့်ကျမ်းမှ ကိုးကားယူငင် သနည်းဆိုတာ သိချင်လျှင်
ဆက်လက်ရေးသားပေးမည်။
မသိချင်လျှင် မရေးတော့ပါ။
(အရည်းကြီးဆိုးများ ရှိသည်ဟု ပြောချင်လျှင် ကျွန်ုပ်လို အထောက်အထား ကျမ်းကိုး
ခိုင်ခိုင်မာမာဖြင့် ပြန်ပြောပါ)
ကျမ်းကိုး။ ။ တိုင်းရင်းပုံထုပ်ကျောက်စာများ ၂တွဲ
ရှေးဟောင်းမြန်မာ ကျောက်စာများ ၅တွဲ
မဟာမုနိဝင်း အတွင်း ကျောက်စာများ ၂တွဲ
မန္တလေး နန်းတွင်းကျောက်စာများ
စစ်ကိုင်းထူပါရုံ ဘုရားတွင်းမှ ကျောက်စာများ ၂တွဲ
ပုဂံနံရံဆေးရေးပန်းချီများ
၁၉၉၀နောက်ပိုင်း ပုဂံဘုရားများ ပြုပြင်မှုမှတ်တမ်း ၄တွဲ
ဘုန်းတင့်ကျော်၏ နှစ်ပေါင်း ၂၀၀၀ကျော်ပြီဖြစ်သော မြန်မာသမိုင်း ၂တွဲ။
Credit.မူရင်း
No comments:
Post a Comment